لشاعر\محمد بن حسين الدسم
ياخوي لك عندي وصاة مصيبــه \\\ ترى وصاتي تلمس العقل وتصيب
ترى وصاة اخوك مابه معيبـــــه \\\ ما دام اخوك مكمل العقل ومنيــب
لابد اموت ولا ذرى تقتدي بــــه \\\ واخشى توازى لدروب الضنابيــب
سمــــر الليالي ما تعلم بغيبــــــه \\\ولا يعلم الا صاحب العلم بالغيـــب
ودي تحرص عن بلا كـل ويبـه \\\ ويصير بك عرف وكمال وتاديــب
ولا المقدر صار ماينحكـي بـــه \\\ ماينمحي هذا من الله مكاتيــــــــب
اول وصاتي بالفروض الوجيبـه \\\ صوم وصلاه واد كــل المواجيب
وثاني وصاتي للامــور الصعيبه \\\ اصبر وبامر الله تهون المصاعيب
جرح ان عبي له مايكلف طبيبـه \\\ولا فيه شي الا ومضاله تجاريــب
وثالث وصاتي تلعت ينعدي بــــه \\\ تلقى عليها بينات المساريــــــب
والي عدابه ذيب من بطن ذيبـــه \\\ ولا واحد عدابها غير هو ذيــب
ترى هذاك العرف من غير ريبـه \\\ راعيه مايطلب ولاله مطاليــب
ورابع وصاتي كثرت الهرج خيبه \\\ هرج بلا معناه مسموج ويخيب
لاصار ماعندك علوم عجيبــــــه \\\ وسط الرجال ترتب الهرج ترتيب
وخامس وصلتي خفة الرجل عيبه\\\ من كثر الدوجات يركض له العيب
ان كان ماعندك لاوازم تجيـــــبه \\\ تنحر لزومك كان ماجاك وتجيب
وسادس وصاتي لك معزه وهيبه \\\ عليك بسفن البر حرش العراقيب
ولا يعجبك زبد الغنم والرويبــه \\\ ترغب لحوش الضان وتخلي النيب
راعي الغنم يشيب قبل شيبـــــه \\\ والبل معزه تجلي الهم والشيــــب
الى اشلهب الوقت لوهي حليبه \\\ يوصلك لديار الهنا والتعاجيـــــب
وسابع وصاتي كان صابتك سيبه\\\وتقدر على كثر الثمن والمطاليب
بنت الحموله والاصيل العريبته \\\ الي اقتناها نال لذه وترغيـــــــب
والي اقتنا بنت الردي والهليبــه \\\ اصبح بهم وجنب الربح تجنيــب
والعوز يرث لك مذله وريبـــــه \\\ اردى الرجال الي يسمونه السيب
عليك بالسقمه ولوهي تعيبـــــه \\\ ما دام بك حيل تنط المراقيـــــــب
ترى كثير المال كلن حبييـــــــه \\\ ينقال له فت جاي لو مافعل طيب
ومن قل ماله صار شنن ارويبه \\\ لوكان صيب يكثرن به شواذيب
وثامن وصاتي علمها ينحري به \\\ ترى الدروب الفاسده فعلها ريب
درب الدنس والعايزه والقريبــه \\\ ترى هذيلن من اكبار العذاريب
ثنتين من داخى عليهن احكي به \\\ والعلم يظهر من اذان الاعاريب
مداخي على عرضه مثل شق جيبه\\\ ومداخي على وجهه تعيبه معاييب
وتاسع وصاتي عن مناقر شريبه \\\ لاصار ىماهو من وساع المساريب
خله ويلقا بالموارد لعيبـــــــــــه \\\ عند الموارد يكثرون الواعيــب
ومن دور العيلات غربل نصيبه \\\ وحسب احسابه من حساب المذاهيب
ومن ترك الشيطان حقه غدي به \\\ ومن هاب طبات الملاعيب ما هيب
عن واحد يبلاك او تبتلي بـــــه \\\ حديكم يناحر اديار الاجانيـــــــب
\وعاشر وصاتي كان حلت مصيبه\\\وبلاك ربك وابتلوك المغاضيب
احذر تمضي ماتسمى غليبـــــــه \\\ امض وتبين عن الحاق المشاعيب
ازبن على حصن الرجال الصليبه\\\ الي يحلون العقد والمناشيــــــب
الي زبنهم ما يجيى له طليبــــــه \\\ عده بعيطا عن سموم الواهيب
وعندي وصايا للعقول اللبيبــــه \\\ الي يضمه بالضلوع المحاديب
الضيف ضيف الله وصابه حبيبه \\\ استقبل اضيوفك بتهلي وتراحيب
قلط له الميسور وماهن جيبـــه \\\ واحلف عن المذخور دين المعازيب
وخويك الي بالخلا تختلي بــه \\\ خيال ولا فوق عوج المصاليــــــب
او من مشى رجلي ولاله نجيبه \\\ او عورت يبلا بها عالم الغيــــب
اصبر وراع الصبر مشكور طيبه\\\ عند الي يدورون الفخر والمراتيب
وقصيرك الي مايصيبك يصيبه \\\ وصابه الله له كرامه وتوجيــــب
والعبد لابد ماكتب له يصيبـــه \\\ والي تجنب تايح الرمي ما يصيب
الشيوخ والحكام زمل منيبـــه \\\ بهم عمار وقضي لازم وتخريــب
ما ينومن من شان منهم حليبه \\\ عقب الصداقه ينقلب كنه الشيــب
اهل خفايا وغيبهم ما دريبــــه \\\ يتحدرجون بدون عيب وتذنيــب
عشرانهم اهل العلوم العجيبــه \\\ وصدقانهم مروين حد المغاليب
ان كان ما حدا الثلاثه تجيبه \\\ مالك بهم والدرب شرق وتغريب
خويهم ما يشتهي نفض جيبــه \\\ حكاي في وجهين يقص العراقيب
هذي يوديها وهذي يجيبـــــــه \\\ وهذي يسويها بصدق وتكاذيب
والي حكى بين الصحيب وصحيبه\\\مخرب ويخرب بين ناس اصاحيب
سوالفه دايم نميمه وغيبـــــــه \\\ ولايستحي كوبان من كلمة العيب
وراعي النقيلي لاتوارد قليبه \\\خل الردي مافاد قربه ولايثيــب
حذراك لاتنزل جوانب شعيبه \\\وبالك تحطه يابو زعزوع بالجيب
