لشاعر\مقحم النجدي الصقري العنزي
يالله يالمعبود ياوالي الاقدار \\\انت الذي مدات جودك لطيفه
انت الذي تعلم خفيات الاسرار\\\ومعيش الخلند واعيونه كفيفه
يارب يارحمن عاون هاللـــكار\\\ وافرج بشدات عليهم كليفه
الي مجالسهم بها بن وابهار \\\ونجر يصوت للهواشل رجيفه
الي صيانيهم وسيعات واكبار\\\ وامفطحات الحيل لضيف ضيفه
تقليطهم لضيف قعدان وابكار\\\وحيل الغنم وقت السنين الحفيفه
يامزنت غرى من الوبل مبدار\\\ برقه جذبني من بعيد ر فيفه
هلت من القبله هماليل وامطار\\\من سيلها الوادي غدى له وحيفه
تنزل على الوديان من الديم مدرار\\\وتصبح بها ريضان ربعي مريفه
وصبح المطر فاحت بها ريح الازهار\\\وتخالف النوار مثل القطيفه
ترعابها قطعاننا سر واجهار \\\تقطف زهر مرباعها مع مصيفه
قطعاننا ماترتع بدمنة الدار \\\ترعى زماليق الفياض النظيفه
ترعى بحد السيف قصاف الاعمار\\\في ظل مروين السيوف الرهيفه
في ضفة الله ثم جبر وجبار \\\ خيالة يوم ىالملاقا عنيفه
وتسمن به العرا من ذود معطار\\\غبوقة الخطار عجل عطيفه
يبني عليها بنية البن لجدار \\\عقب الضعف صارت اردومه منيفه
وان سوهجوا عنها معاميس الابصار\\\حنا نرد الي يبيها نكيفه
ماهي سوالف مسرد عقب مانار\\\مع العرب يشبه لخطو الهديفه
من لاصبر ماحاش بالفود دينار\\\وتصبح احواله عند ربعه كسيفه
خطو الولد مثل البليهي ليا ثار \\\ زود على حمله نقل حمل اليفه
وخطو الولد مثل النداوي لياطار\\\صيده سمين ولا يصيد الضعيفه
وخطو الولد فعله على العيب والعار\\\صفر على عود تضبه كتيفه
وخطو الولد كوبان مايقرب الحار\\\لا نافنع نفسه ولا منه خيفه
وحنا كما مشخص عن الصرف مابار\\\بالوزن نرجح والدراهم خفيفه
وحنا لك الله مانخفي سنا النار \\\ولا ننزل الا بالديار المخيفه
دار بها الحقران ماهي لنا دار\\\وش عاد لوفيها وناسه وكيقه
وحنا لك الله ىمن بعيدين الاخطار\\\والنفس مانلحق هواها حسيفه
حلوين لصاحب وللخصم جنزار\\\ وعدونا لوهو بعيد نخيفه
الا مع ذالك لك الله لنا كار \\\وعن جارنا ماقط نخفي الطريفه
نرفا خماله ىرفية العش للغار\\\ونودع له النفس القويه لطيفه
والجار له حشمه وقيمه وتعبار\\\وجاراتنا عن كل عايز عفيفه
مازارهن من يبى الحيف زوار\\\الا ولا عنهن ندس الغريفه
والجار مانذكر خماله ولو جار\\\ ولاننهره بالقول ولو بان حيفه
نبي ليامنه بدل الدار بديار \\\,وقام يتذكر ماحصل من حليفه
يعد ماشافت عيونه وما صار\\\والكل عن جاره يعد الوصيفه
جار على جاره بختري ونوار\\\وجار على جاره صفة محيفه
والطيب نوهاته صعيبات واكبار\\\مبطي لدسمين الشوارب وظيفه
ولابدماتذهب تواريخ اذكار \\\والطيب يشرى بالاعمار القصيفه
وصلاةربي كثر ماتخضر اشجار\\\على الرسول الي اعلومه شريفه
